Lisboa-Coimbra-Aveiro: 23 ao 26 Outubro 2024

Alumnado de 4.º ESO e mais de 1.º e 2.º Bacharelato realizamos unha visita didáctica a Portugal, concretamente á súa capital Lisboa e tamén ás cidades de Coimbra e Aveiro.
A primeira parada foi na cidade universitaria de Coimbra onde, baixo unha calor abafante, visitamos os lugares máis representativos desta universidade que das máis antigas en funcionamento continuo do mundo e a máis antiga de Portugal. Pola noite chegamos ao hotel na costa Caparica.
No día seguinte, xa en Lisboa fixemos unha vista guiada á Biblioteca Nacional de Portugal, onde puidemos ver o orixinal do Cancioneiro da Biblioteca Nacional, tamén denominado Cancioneiro Colocci-Brancuti, unha alfaia cultural galega e portuguesa que é a colección de cantigas escritas en galego-portugués. A seguir visitamos a zona universitaria da Universidade de Lisboa e despois de comer fixemos unha vista guiada ao Museo e ao Estádio do Benfica. Á noitiña desprazámonos ata a zona de Belém, onde visitamos a Torre de Belém, o Padrão dos Descobrimentos, o Mosteiro dos Jerónimos e probamos os famosos pasteis de Belém.
O terceiro día tocou o centro da cidade de Lisboa. Comezamos na Praça dos Restauradores e mais o interactivo Museu do Dinheiro, que inclúe a Muralha de D. Dinis. Tamén nos detivemos na Praça de D. Pedro IV, na rúa Augusta e o seu grande Arco e na Praça do Comercio (Terreiro do Paço). Despois de comer estivemos coa tuna da Facultade de Farmacia e subimos desde a Baixa ata o Chiado e pasamos pola cafetería A Brasileira e o largo do Carmo, coa súa relevancia dentro da Revolução dos Cravos de 1974, onde tivemos unha excelente vista da cidade de Lisboa desde o elevador do Carmo.
O último día, para rematar esta visita a Portugal, regresamos a Celanova parando en Aveiro para visitala, comer e onde vimos os famosos molicieiros.