O noso Centro

Lonxana Celanova vinculeira,
torre ebúrnea da miña mocidade,
cando te lembro sae da súa toqueira
coma un furón de soños, a saudade…
Celso Emilio Ferreiro

Tomamos prestados estes versos de Celso Emilio Ferreiro para convertelos nun fermoso limiar, pero afastámonos da saudade que destilan, porque a educación e a mocidade son para nós realidades luminosas.

Poida que estudemos, medremos e soñemos dentro dos grosos e vetustos muros do mosteiro, pero toda a súa solidez e a opacidade vólvense transparentes por obra e graza deste espazo virtual, e desde el damos a benvida a quen quixer asomarse ao noso devir diario: libros, programacións, recreos, excursións, laboratorios, conferencias, concertos, encontros, normas, deporte...en definitiva, comunidade e persoas en interacción permanente, como a propia web que agora bota a andar.

HISTORIA E FUTURO NO NOSO CENTRO

De portas adentro:

Nivelación das diferenzas: contamos con profesorado terapéutico que facilita a adaptación do alumnado  con necesidades específicas.

Implicación do profesorado:  prestamos atención individualizada ao alumnado que o demanda en espazos como a "Aula 201", onde especialistas en matemáticas e linguas atenden e supervisan o estudo das respectivas materias.

Visión multidisplinar: con proxectos educativos nos que se coordinan varios departamentos (Contratos programa, EDLG, revista "O Poleiro", clube de lectura "Hora 33", "Exército Dumbledore", Plambe, Meteoescolas, Programa Deportivo de Centro)

Dinamismo e formación integral: porque non todo é estudar; tamén medramos xogando e creando con recreos lúdicos e deportivos, fomentando hábitos de vida saudable co proxecto deportivo de centro "Mens Sana in córpore sano".

De portas para fóra:

Viaxamos polo mundo: ao CERN en Xenebra, á neve con Educación Física, á costa con Ciencias, a París con Francés, a Porto con Lingua Galega, a Madrid con Música, amén das tradicionais viaxes coas materias de Relixión e Historia ou as de fin de ciclo con contido curricular e dimensión lúdica.

Abrimos a Biblioteca  en horario extraescolar todos os martes, mércores e xoves de 15:30 a 17:15 horas para servizo do noso alumnado e dos socios externos: antigos alumnos, pais, nais e lectores da vila.

Galería de Fotos